PETISYON sa Katawhan batok sa itukod nga 20 MW Coal-Biomass Power Plant diri sa Dakbayan sa Iligan

Tungod sa krisis sa enerhiya nga nasinati sa pulo sa Mindanao, ang dakbayan sa Iligan City naapektuhan ug nakasinati usab niini nga krisis. Kini nga krisis nakaapekto usab sa operasyon sa mga kompanya sa Iligan sama sa Lafarge Cement Corporation nga nahimutang sa Brgy. Kiwalan, Iligan City. 

Tungod niini, buot magtukod og Power Plant ang Lafarge Cement Corporation aron matubag ang ilang panginahanglano alang sa ilang padayon nga operasyon. Ila usab kuno nga ibaligya ang kuryente sa uban pang manginahanglan niini sama sa dakbayan sa Iligan. Usa ka 20 megawatt (MW) Coal-Biomass Power Plant (80 % Coal, 20 % Biomass) maoy itukod. 8 MW sa produkto sa power plant maoy gamiton sa Lafarge Cement Corporation ug ang 12 MW maoy ilang ibaligya. 

Bisan tuod adunay positibong ikatabang sa dakbayan ang produkto sa maong Coal-fired power plant, mas dako ang kadaut nga mahatag niini sa atong kinaiyahan, palibot ug ilabi na sa atong panglawas. 

Ang usa ka planta nga pinadagan sa uling o coal mobuga og hugaw nga hangin sa panghaw (chimney) nga nagdala og mga makadaot nga mga particulate matters ug aso nga adunay sagol nga Carbon Dioxide, Nitrogen Oxide, sulfur ug uban pa. Kini nga mga particulate matters ug aso dako og ikadaot sa atong panglawas, ug kini makahatag og mga sakit sama sa lung cancer, kagid-kagid sa panit (skin disease), hubak (tuberculosis). Kasagaran sa maapektuhan niini ang mga bata hilabina ang gagmayng bata. 

Sa pagkakaron wala pa natukod ang coal-fired power plant, nag-antos na gani ang katawhan sa Barangay Kiwalan sa mga binuga nga aso sa mga planta sama sa Lafarge Cement Corporation. Unsaon nalang kung kini madungagan pa og usa na pod ka plantang makadaut? 

Ang mga hugaw sa planta makaguba sa kadagatan ug sa panginabuhian, ilabi na sa mga mananagat. Ang tubig dagat nga gigamit sa pagpabugnaw sa init nga tubo ibalik kini didto sa dagat. Ang kainit sa maong tubig moresulta sa coral bleaching o pagkadaot sa mga coral reefs. 

Ang mga coral reefs maoy mga pinuy-anan sa mga isda. Kung kini maguba, moresulta kini sa pagubos sa populasyon sa mga isda. Kinahanglan na dayon sa mga mananagat nga modayo sa ubang dapit aron mangisda, nga modugang usab sa  gasto sa pangpagasolina. 

Ang mga hugaw nga aso nga binuga sa planta nga gigamitan og uling o coal, grabe usab nga makadaut sa atong kinaiyahan. Ang uling o Coal nga maoy gamitong sugnod sa planta, kini minahon pa sa mga kabukiran sa Mindanao o sa laing lugar sa Pilipinas ug uban pang mga nasud nga maoy hinungdan sa pagkaguba sa atong kalasangan ug kabukiran. Ang pagsunog sa uling nga magbuga og karbon sa kawanangan ug ang pagguba sa mga bukid ug kalasngan (nga mao untay musuyop sa mga binugang karbon), maoy makapainit sa atong kalibutanan.  

Ang pagtaas sa temperature sa kalibutan moresulta usab mga kusog nga mga kalamidad o trahedya sama sa atong nasinati panahon sa Typhoon Sendong nga mingkalas og libuhan ka kinabuhi ug milyones nga kantidad sa kabtangan.

Sa pagkakaron kita nakasinati napud og taas kaayong hulaw o init nga maoy hinungdan sa pagkadaot sa daghang pananom. Tungod niini daghan na usab ang gigutom ug nalugi nga mga mag-uuma. Gani, ang saka sa temperatura sa karong panahon, natala nga pinakataas sukad sa 1880s. 

Tungod niini, ang katawhan sa dakbayan sa Iligan City makusganong mosupak sa pagtukod sa Coal-fired Power Plant sulod sa Lafarge Cement Corporation kay kini usa ka planta nga moguba sa kinaiyahan ug hinay-hinay mopatay sa katawhan. 

Nakita nga sa maong planta dili makabenipisyo ang katawhan kun dili ang mga dagkung negosyate lamang. Ang ordinaryong katawhan maoy mamahimong alaut kanunay. Dugang pa niini, ang ilang giingong trabaho dili kini malahutayon, tungod kay kini sa panahon lang sa pagtukod sa planta (construction). 

Adunay mga alternatibong rekursos nga pwedeng kakuhaan og enerhiya nga ginatawag nato nga RENEWABLE ENERGY SOURCES. Kini mao ang kainit sa adlaw, katubigan, hangin ug geo-thermal power sources. Ang dakbayan sa Iligan adunay daghang waterfalls nga pwedeng i-develop nga mamahimong hydro power-plants sama sa Ma. Cristina falls. 

Aron ipakita ang among PAGSUPAK SA PAGTUKOD SA COAL-FIRED POWER PLANT sa LA FARGE CEMENT CORPORATION, among ibutang ang among pangalan ug pirmi dinhi nga petisyon.

Download here: PDF version of the Petition