SUPAKON
ang PAGTUKOD ug COAL-FIRED POWER PLANTS sa ILIGAN CITY, KAUSWAGAN, LANAO DEL
NORTE ug OZAMIS CITY
Ang kinaiyahan
mao ang atong kinabuhi!
Kami nga mga
nagpakabanang katawhan sa Pilipinas nabalaka ug daku sa paspas nga proyektong
Coal (coal-fired power plants ug coal mining) sa nasud.
Dinhi sa
Northern Mindanao, ang Lafarge Cement Corporation buot motukod ug 20MW nga
coal-fired power plant sa Kiwalan, Iligan City samtang sa Pulot, Ozamis City
usab nag-apply ang Ozamis Power Generation nga motukod ug 300MW nga planta. Ang
usa sa pinakadakung planta niining tulo mao ang anam nga ginatukod sa Tacub ug
Libertad, Kauswagan, Lanao del Norte nga 540MW.
Tungod daw
kini sa kakulang sa tinubdan sa suplay sa elektrisidad apan gipamahayag mismo
ang National Grid Corporation (NGCP) nga adunay dili moubos 400MW nga sobra
suplay sa Mindanao. Gikompirma kini sa Mindanao Development Authority ug Mindanao
Power Monitoring Council (MPMC) nga may sobra pa nga suplay sa elektrisidad.
Samtang adunay
231 nga aplikasyon sa Renewable Energy projects sa Mindanao nga dili moubos ang
kapasidad sa 2,419MW. Buot ipasabot dili na kinahanglan ang mga proyekto ug
plantang Coal.
Ngano
nga angay kining supakon?
- Gub-on niini ang bahandi sa katubigan ug ang mismong dagat sa Iligan ug Panguil Bay.
- Modislokar sa daghang komunidad sa mga mangingisda sa Misamis Oriental, Lanao del Norte, Misamis Occidental, Zamboanga del Sur ug Iligan City nga usab nagkuha sa ilang panginabuhian sa dagat.
- Ang mga deklaradong Fish Sanctuaries ug Protected Areas (45 ektarya sa Kiwalan ug Dalipuga); 6 ka ektarya sa Tacub ug lain pang 8 ka sanctuaries sa Kauswagan, Lanao del Norte dugang pa ang 21 ka ektaryang kabakhawan sa kabaybayunan maapektuhan unya. Mamahimong mokunhod ang ihap sa mga isda ug hingpit nang maguba;
- Maguba ang Kinaiyahan tungod kay kining coal mao ang pinakahugaw nga tinubdan sa enerhiya ug mobuga kini ug mga kemikal sama sa mercury, uranium, abog ug uban pang makahilong kemikal nga mahiadto sa kahanginan ug katubigan, dugang pa ang epkto niini sa panglawas sa katawhan, gawas pa sa ilang pagmina ug coal dinhi sa Pilipinas nga mopatag ug mobungkag gayud sa kabukiran ug mawad-an na sa ilang Yutang Kabilin ang mga Lumad;
- Dakung magtatampo (contributor) sa kainit sa kalibutan ang coal tungod sa carbon dioxide nga ibuga niini ngadto sa kawanangan ug mobara sa kainit sa adlaw nga dili na makagawas balik sa kawanangan;
- Pagkabungkag sa mga Komunidad tungod kay bahinon man niini ang baruganan sa mga komunidad pinaagi sa mga saad ug hanyag nga material;
Panawagan:
- Tagaan ug igong gibug-aton ang tingog ug baruganan sa mga katawhan sa komunidad sa hisgutanang enerhiya ug uban pa;
- Hingpit na nga IDILI ang Coal plants sa Pilipinas ug ang hinanaling pagkansela sa mga permit sa pagtukod ug planta sa Iligan, Ozamis ug Kauswagan;
- Ibasura ang Electric Power Industry Reform Act nga nagtugot sa pag-pribado sa sector sa enerhiya ug mga proyektong coal sa nasud ug repasuhon ngadto sa pagpalig-on sa Renewable Energy Act sa Pilipinas dungan ang pagpanday ug balaod alang sa tinuod nga Renewable Energy ug Pampublikong Sektor sa Enerhiya;
- Imbestigahan ang mga pagpanglapas sa tawhanong katungod sa mga apektadong komunidad ug pagbayad sa mga damyos ngadto kanila ug ang papanubagon ang mga may kalabutan sa pagpanglapas.
- Transpormasyon sa Enerhiya ngadto sa Renewable Energy Sources;
_________________
No comments:
Post a Comment