Liga ng Makabagong Kabataan: Apat na Taon Na: Katarungan, Nasaan Ka?

Wednesday, 21 November 2012

Apat na Taon Na: Katarungan, Nasaan Ka?

Habang ang lahat ay abala sa iba’t-ibang bagay, sa araw na ito makalipas ang apat na taon, may 58 na murang katawang tinabunan ng lupa bunga ng pagka-ganid sa kapangyarihan at dulot ng sistemang mapaniil sa isang sulok ng probinsay ng Maguindanao. Mga mamamahayag at sibilyang nais lamang sana isapraktika ang karapatang lumahok sa halalan at ipabatid sa lipunan ang mga pangunahing kaganapan, sa isang iglap, sama-sama na silang lumisan. Kinitil ang Buhay nang walang kalaban-laban.

Ang Tuwid na Daan

Uhaw! Matagal na! Uhaw sa Katarungan ang mga Kaluluwa at mga kaanak at kaibigan ng mga biktima. Umasa na sa pagpalit ng bagong pamunuan dala-dala ang TUWID NA DAAN na krusada ay mas may kabuluhan ang Sistema ng Katarungan ng bansa. Subalit, tila hanggang krusada na lamang ito sa politika ng pag-impluwensyang kumampi na sa bagong pamunuan ng bansa ang malaking clan na sangkot sa nasabing karumal-dumal na krimen. Hanggang ngayon Uhaw sa Katarungan! Hindi ramdam ang tuwid na daan.

Masaker sa Sangkatauhan! Masaker sa Karapatan! Masaker sa Kalikasan! Masaker Kahit Saan!

Ang Maguindanao Massacre ay isa lamang sa napakaraming mukha ng Masaker sa Karapatang sinapit ng mamamayan. Lahat na lang ay gagawin nang mga nasa posisyon upang ipagtanggol ang kanilang pagka-ganid.

May iba ding mukha ng Masaker ngayon na tila ba, bumabalik-balik pa. Ang Masaker sa Kalikasan.

Ang patuloy na paglikom ng ginansya at tubo ng mga kapitalistang dayuhan at lokal kakuntsaba ang mga institusyong politikal ay naghatid sa sangkatauhan sa sadlak at dulo ng kawalan.

Lumalawak ang bilang ng nagugutom at naghihirap, nawawalan ng trabaho at naghahanap, at iba pa.

Dulot nitong hagupit ng bagyong Yolanda, may dagdag na 5.1 Milyon ang walang trabaho sa lakas pag-gawa ng bansa. Apektado ang halos 13 Milyong mamamayan at karamihan ay mahihirap na sa wala pa ang kalamidad ay nagtitiis na sa hgupit ng ekonomiyang hindi maka-tao.

Katarungan, Nasaan?

Nitong ika-apat na taon mula nang maganap ang Maguindanao Massacre, ang Liga ng Makabagong Kabataan kasama ang iba pang mga kilusang nagsusulong ng Katarungan para sa mga biktima ay PATULOY na NAGPAPABATID at SUMISIGAW ng KATARUNGAN para sa mga KALULUWANG UHAW!

KATARUNGAN para sa KALIKASAN! KATARUNGAN para sa mga BIKTIMA ng YOLANDA! KARAPATAN, IPAGLABAN!

Reemar Alonsagay
Secretary General
LMK-Ranao
lmkabataan@yahoo.com.ph

No comments:

Post a Comment

Kasaysayan

Sa kasaysayan ng pagbabago ng lipunan, ang sektor ng kabataan ay kinikilala bilang inisyador at ahitador. Pinatunayan ito ng Kasaysayan ng Pilipinas.

Ang unang pakikibaka laban sa kolonyalismo sa pamamagitan ng isang kilusang propaganda ay inumpisahan ng mga kabataan. Maging ang pag-organisa ng Katipunan ay pinangungunahan ng mga Kabataan sa pamumuno ni Andres Bonifacio. Kaya malaking bilang ng mga mandirigma ng Katipunan ay mga Kabataan.

Sa kasalukuyan, tumitindi ang kahirapang dinadanas ng sambayanan. Dahil sa kawalan ng trabaho at ng proteksyon ng mga manggagawa laban sa malupit na kapitalista, ang sektor ng kabataan ang isa sa mga malaking naapektuhan nito. Ang lalong tumaas na matrikula, laganap na dekadenting kultura at kawalan ng trabaho ay ilan lamang sa mga problemang pinapasan ng mga kabataan. Nandiyan pa ang nakaambang usaping kapayapaan kung saan ang hanay ng kabataan ang siyang primaryong pwersa sa kampanya ngunit hindi nabibigyan ng pagkakataon na maibabahagi ang ninanais at pananaw nito.

Ito ang pangunahing hamon na hinaharap ng kasalukuyang henerasyon. Bilang tugon, may mga pagkilos sa hanay ng kabataan sa iba’t-ibang lugar na may kanya-kanyang buwelo at mukha. Ang sitwasyong ito ang nag-udyok sa pagbuo ng Liga ng Makabagong Kabataan (LMK). Sapagkat pinatutunayan ng kasaysayan na epektibo lamang na matugunan ang mga problemang kinakaharap ng sektor sa pamamagitan ng isang organisasyon at isang sustinidong pagkilos.

Mula sa Mindanao Youth Peace Summit na naganap noong 2001 sa General Santos City, nabuo ang Alyansa ng Kabataan Mindanao para sa Kapayapaan (AKMK) na unang binuo ng mga partisipante mula sa iba’t-ibang probinsya ng Mindanao. Mula dito, nagkaroon ng konsultasyon sa Cotabato City noong Agosto 2003 at nabuo ang Liga ng Makabagong Kabataan bilang isang politikal na organisasyon sa hanay ng mga kabataan, na naglalayong mapalakas ang sektor ng Kabataan sa Mindanao at ng buong bansa.