Bakit ako tutol na ilibing sa LNMB si Marcos?

November 18, 2016

Ako si Zhen  Marohombsar isa sa mga myembro ng Liga ng Makabagong Kabataan (LMK)  at isa sa mga lumahok sa kilos protesta na ginanap noong Nobyembre 9, 2016 para ekondina ang desisyon sa korte suprema na ilibing si dating pangulong Ferdinand Marcos sa libingan ng mga bayani. Ito ay dahil isa sa mga biktima ang aming pamilya noong kasag-sagan ng Martial Law .

Ayon sa aking pananaliksik ukol sa mga karanasan sa aking pamilya  noong bata pa sila ay sinalakay sila ng mga sundalo doon sa Marawi City, Lanao Del Sur. Sa kasagsagan ng Martial Law  marami  ang pinatay, ginahasa at tinortyur.

Kasama sa mga pinatay ay ang mga kamag-anak  ng aking ina, hinabol sila ng mga sundalo kasama ang kanyang mga kapatid, hanggang tumalon sila sa tulay na pagitan  ng Pantar at Saguiaran para takasan ang mga sundalong humahabol sa kanila.

Nagtago sila sa ilalim ng tulay ng ilang araw. Walang makain, pagod at natatakot na baka makita sila ng mga sundalo. Hanggang ngayon bakas parin sa kanilang mga puso’t  isipan ang mga pangyayari noong panahon ng Martial Law.

Tapos ito ba ang masasabi na tunay na bayani? O baka ito ang makakasira sa dignidad ng mga tao. Sa pagkakaalam ko, ang tunay na bayani ay handang magpakamatay para sa kanyang bayan at hindi ang pumatay ng kababayan. 

-----------------

Si Zhen Marohombsar (18 years old) ay isang Meranaw mula sa Marawi City, Lanao del Sur. Ang pahayag na ito ay binasa niya noong November 18, 2016 panahon press conference ng LMK kung saan siya ay isa sa mga tagapagsalita. 

Ang mga kabataang Pilipino ay Mangmang at Walang pakialam

Pahayag ng Liga ng Makabagong Kabataan

November 17, 2016

                  “Bayaran, mangmang, bobo, walang alam sa kasaysayan, yellowtards, at pasaway”. Dagdag na rito ang pahayag ni Communications Secretary Martin Andanar na kami’y mga “temperamental brats” o mga barumbado. Ito ang kabi-kabilang batikos na aming inani noong nagkilos protesta kaming mga miyembro ng Liga ng Makabagong Kabataan (LMK) laban sa desisyon ng Korte Suprema na ilibing si Ferdinand Marcos sa Libingan ng mga Bayani noong November 9 sa Iligan at Marawi City.

                  Ito ba ang pangkalahatang pagtingin sa aming mga kabataan ngayon? Kaming mga kabataan ay nandirito upang ipahayag ang aming pagtutol sa pagturing sa amin na mga mangmang at walang pakialam at sa patuloy na pagpapalaganap ng maling kaisipang ito sa aming kapwa kabataan. Kaming bumubuo ng pinakamalaking porsyento ng populasyon ng bansa ay ang syang may pinakamalaki ding papel sa pagpanday ng isang lipunang may mataas na pagpapahalaga sa karapatan at katarungan.

Ang paglahok namin sa nation-wide protest noong November 9 ay sya mismong pagganap namin sa papel na ito: ang patuloy na pag-aralan ang aming lipunan, mamulat sa mga karanasan at manindigan at kumilos kasama ang iba pang mga mamamayan.

Simula pa man noong 2002, ang LMK ay isinusulong na ang makatao at makatarungang pagbabahagi ng pambansang yaman sa mga pangunahing serbisyong sosyal tulad ng edukasyon, pangkalusugan, tubig, kuryente, pabahay at iba pa. Kung kaya’t nananatili kaming tutol sa korapsyon, pandarambong, pandaraya at pag-abuso sa kapangyarihan.

Sa katunayan, malakas naming tinutulan ang dayaan sa 2007 election sa Iligan City. Nang magkaroon ng pambansang krisis sa bigas noong 2008, kasama kami sa nanawagan ng madaliang pamamahagi ng National Food Authority ng bigas sa mga nagugutom. Nang nanalasa ang mga bagyong Sendong, Agaton at Yolanda, kasama kami sa nanguna sa pagsiguro na ang karapatan at dignidad ng mga survivors ay napangalagaan mula sa relief distribution hanggang sa rehabilitation. Nanguna din kami sa pagtutol sa privatization ng Iligan Diesel Power Plant noong 2012. Kami din ang nag-organisa ng 92-Kilometrong martsa protesta mula Lala, Lanao del Norte hanggang Kiwalan, Iligan upang ipanawagan ang paghinto sa pagpapatayo ng coal-fired power plant sa Iligan at Kauswagan, Lanao del Norte dahil sa pangamba na ito ay magdudulot ng matinding kasiraan sa ating kalikasan at kalusugan.

Kung kaya’t mananatili kaming tutol sa paglibing sa diktador na Marcos sa libingan ng mga bayani sapagkat ito ay pagkait ng hustisya sa mahigit 70,000 na nakulong, 34,000 na natortyur at 3,240 na pinatay sa panahon ng martial law. Ito ay hindi lamang isyung politikal. Ito rin ay usaping personal sapagkat karamihan sa mga kabataang nagprotesta ay mga anak, apo at mga kamag-anak ng mga biktima ng martial law.  Ang pagkait ng hustisya sa kanila ay pagkait ng makatarungang lipunan para sa mga makabagong kabataan.

Hangga’t walang hustisya, kami ay mananatiling lumalaban, naninindigan at kumikilos.

Rayyan Gonzales, Chairperson of LMK Iligan 

Mobile Number: 09168632410 Email: lmkabataan@gmail.com    

Trapo, 'wag iboto!

Ngayong darating na ika-9 ng Mayo magaganap ang eleksyon na tutukoy sa paroroonan ng ating bansa sa darating na anim na taon. Bilang kasapi sa sektor ng kabataan, aktibo kaming lumalahok sa pagbabago ng ating bansa lalo na’t ang kabataan ang siyang may pinakamaraming naitalang botante- hindi bababa sa 37% ng botante o 20 milyon ang tinatayang bilang. Dagdag pa dito, bilang mga lider ng mga kabataan sa aming komunidad, kami ay humihimok sa mga kapwa kabataan na huwag magpapaalipin sa mga bumibili ng boto sa halip ay pangunahan ang pagboto ng tama dahil ito ay nagpapakita ng ating malaking partisipasyon para pangunahan ang pagbabago sa ating bansa.

Mula sa hanay ng Liga ng Makabagong Kabataan, magsusumite kami ng aming pahayag para sa darating na halalan. Humihikayat din kami sa mga ibang kabataan, gobyerno at ibang sektor na suportahan ang aming mga hinaing. Bilang isa sa mga botante, iaangat namin ang kakayahan ng mga kabataan na pumili ng wastong pinuno sa pamamagitan ng mga:

1. Ang hindi pagboto sa mga kandidato na hindi inuuna ang kapakanan ng nakakarami.

2. Ang hindi pagboto sa mga kandidato na hindi tumutugon sa panlipunang serbisyo kagaya ng libreng edukasyon, libreng patubig, at renewable na enerhiya.

3. Ang hindi pagboto sa mga kandidatong umaapak sa ating mga karapatan.

4. Ang pagsuporta sa mga kandidatong inuuna sa plataporma ang mga isyu na kailangan ng agarang sulosyon. Kagaya ng renewable energy, libreng edukasyon sa mga mahihirap at dagdag na pundo ang mga SUCs, maglaan ng mga sustinableng trabaho para sa lahat, taasan ang sahod ng mga pribado at pampublikong empleyado, at isakatuparan ang sapat na sahod para sa mga manggagawa.

5. Ang pagsuporta sa mga kandidato na bukas ang pag-iisip para sa mga LGBT at hinihingkayat nito ang mga LGBT na makiisa na tumaguyod sa pag-unlad ng ating lipunan. 

Naniniwala ang Liga ng Makabagong Kabataan na kung susupotahan natin ang mga nakalatid sa itaas ay magkakaroon tayo ng bagong lider na siyang pupunla ng solusyon at tutugon sa mga isyu at problema na kinakaharap ng ating bansa. Naniniwala din ang Liga ng Makabagong Kabataan na kung palalakasin natin ang puwersa ng mga kabataan at iangat ang kanilang partisipasyon sa politika, ay magkakaroon tayo ng pag-asa sa ating bayan.

Kabataan! Lumaban! Manindigan! Kumilos!